အသိပေးထုတ်ပြန်ခြင်း

  • Fri, 23 August 2019

၂၀၁၉ ခုနှစ်၊ ဩဂုတ်လ ၂၃ ရက်

---------------------------------

၂၃-၈-၂၀၁၉ ရက်နေ့တွင် ထုတ်ဝေသည့် Daily Eleven သတင်းစာ၌ အဂတိလိုက်စားမှု တိုက်ဖျက်ရေးကော်မရှင်သို့ တိုင်ကြားထားသည့် အမှုတစ်ခုအတွက် ကော်မရှင်၏စေလွှတ်မှုအရ လာရောက် စစ်ဆေးသည့် အရာရှိတစ်ဦးမှာ အစစ်ဆေးခံရသူအား ခြိမ်းခြောက်ခြင်း၊ မလျော်ဩဇာသုံး စစ်ဆေးခြင်းနှင့် အမှုမဖွင့်စေရန် ငွေကြေးကိစ္စ ညှိနှိုင်းခြင်းများရှိသည်ဟုဆိုကာ အစစ်ဆေးခံရသူ၏ ညီမဖြစ်သူက အဂတိလိုက်စားမှုတိုက်ဖျက်ရေးကော်မရှင်ထံ တိုင်ကြားသည့်သတင်းကို ဖော်ပြပါရှိခဲ့ပါသည်။

အထက်ဖော်ပြပါ အကြောင်းအရာကိစ္စနှင့်ပတ်သက်၍ ဒေါ်မာလာတင်၏ ညီမဖြစ်သူ မတင်ဇာဇာထွေးက ၆-၈-၂၀၁၉ ရက်နေ့တွင် ကော်မရှင်သို့ လိပ်မူတိုင်ကြားခဲ့ပါသည်။ ယင်းတိုင်ကြားစာတွင် ကော်မရှင်မှ ဦးမောင်မောင်တင် ဆိုသူသည် ၎င်း၏လုပ်ပိုင်ခွင့်ရာထူးကို အသုံးပြု၍ ခြိမ်းခြောက်၊ အနိုင်အထက်ပြု စစ်ဆေးခြင်းများ ပြုလုပ်ခဲ့သဖြင့် လိုအပ်သလို အရေးယူ ဆောင်ရွက်ပေးရန် ဖော်ပြထားပါသည်။ အဆိုပါ တိုင်ကြားခံရသူ ဦးမောင်မောင်တင်သည် ကော်မရှင်ရုံး၊ တားဆီးကာကွယ်ရေးနှင့် စုံစမ်းစစ်ဆေးရေးဦးစီးဌာနမှ အရာထမ်းတစ်ဦးဖြစ်ပြီး မြောင်းမြမြို့နယ်၊ မြန်မာ့လယ်ယာဖွံ့ဖြိုးရေး ဘဏ်မန်နေဂျာဖြစ်သူ ဒေါ်မာလာတင်၏ တောင်သူ အချို့ကို စိုက်ပျိုးစရိတ်ချေးငွေများ ထုတ်ပေးရာတွင် အဂတိလိုက်စားမှုများရှိခဲ့ကြောင်း တိုင်ကြား စာအား ၃၀-၄-၂၀၁၉ ရက်နေ့မှ ၂-၅-၂၀၁၉ ရက်နေ့အထိ မြောင်းမြမြို့သို့ သွားရောက်စစ်ဆေးခဲ့စဉ် စစ်ဆေးရေးမှူးအဖြစ် ပါဝင်ဆောင်ရွက်ခဲ့သူဖြစ်ပါသည်။

ကော်မရှင်သည် ဒေါ်မာလာတင်၏ ညီမဖြစ်သူ မတင်ဇာဇာထွေး တိုင်ကြားစာကို ၈-၈-၂၀၁၉ ရက်နေ့တွင် လက်ခံရရှိခဲ့ပြီး ၁၅-၈-၂၀၁၉ ရက်နေ့တွင် ကျင်းပပြုလုပ်သည့် ကော်မရှင် အစည်းအဝေးအမှတ်စဉ် ၅၆/၂၀၁၉ ဆုံးဖြတ်ချက်အရ ရှေးဦးစုံစမ်းရေးအဖွဲ့အား ယင်းနေ့တွင်ပင် ညွှန်ကြားရေးမှူးတစ်ဦး ဦးဆောင်သော အဖွဲ့အား ဖွဲ့စည်း၍ စစ်ဆေးတင်ပြရန် တာဝန်ပေးဆောင်ရွက်လျက်ရှိပါသည်။

ကော်မရှင်သည် ရှေးဦးစုံစမ်းရေးအဖွဲ့၏ စစ်ဆေးပေါ်ပေါက်ချက်ပေါ်မူတည်၍ နိုင်ငံ့ဝန်ထမ်း ဥပဒေ၊ နည်းဥပဒေများ၊ ကော်မရှင်ကျင့်ဝတ်တို့နှင့်အညီ ထိရောက်စွာ အရေးယူဆောင်ရွက်သွားမည် ဖြစ်ကြောင်း အသိပေး ထုတ်ပြန်အပ်ပါသည်။

ဆက်စပ် သတင်းများ